గబ్బిలాలను మన దేశంలో కూడాతింటారు ...ఎక్కడో తెలుసా /...

 

         గబ్బిలాల వలనే చైనాలో కరోనా వైరస్ వ్యాపించిందనే వార్త చాలా రోజుల నుండి ప్రచారంలో ఉంది. అయితే గబ్బిలాలను కేవలం చైనాలోనే కాదు భారత దేశంలో కూడా ప్రజలు తింటారు. నమ్మకపోతే ఈ కథనాన్ని పూర్తిగా చదవండి... మీకే అర్ధమవుతుంది.

 

                                             అక్టోబర్ మధ్య నాటికి భారత ఈశాన్య రాష్ట్రమైన నాగాలాండ్ లోని మిమి గ్రామంలో ఒక వింత పండుగ జరుగుతుంది. ఈ సమయంలో బోమర్ తెగ ప్రజలు గ్రామంలోని గుహల్లో అన్వేషణ చేపడతారు. అక్కడ ఎవరికీ కనిపించకుండా ఉండే గబ్బిలాలను పట్టుకోవడమే వారి లక్ష్యం. ఎందుకంటే పండుగలో భాగంగా వారు గబ్బిలాలను పట్టుకుని వాటిని చంపి మాంసాన్ని వండుకుంటారు. పురుషులు మరియు మహిళలు సమానంగా ఈ వార్షిక పండుగలో పాల్గొంటారు. విదేశాల్లో గబ్బిలాలను చంపి ఎండబెట్టిన తరువాత వాటి ఎముకల నుండి పౌడర్ ను సేకరించి ఔషధాల తయారీలో ఉపయోగిస్తారని చెబుతారు. ఇలాంటి వాటికి చైనీస్ గబ్బిలాలు బాగా ప్రాచుర్యం పొందాయి. కానీ నిఫా, కరోనా వైరస్ ల వ్యాప్తితో ఈ గబ్బిలాలు ప్రపంచ వ్యాప్తంగా చర్చనీయాంశంగా మారాయి. ఇవి వైరస్ ను మానవులకు వ్యాపింపజేస్తాయనే వాదన ఉంది. ఈ నేపధ్యంలో నాగాలాండ్ లోని మిమి గ్రామంలో గబ్బిలాలను చంపి తినేందుకు ఏకంగా వార్షిక ఉత్సవాన్ని నిర్వహిస్తారనే విషయం చాలా మందిని ఆశ్చర్యానికి గురి చేస్తుంది.

మిమి గ్రామం విశేషాలు

                                                                                                                  మిమి గ్రామానికి చేరుకోవాలంటే ముందుగా నాగాలాండ్ యొక్క ముఖ్య నగరమైన దిమాపూర్ కు వెళ్లాలి. టూరిస్టులు అక్కడి నుండి కిఫైర్ కు చేరుకోవచ్చు. ప్రైవేటు బస్సు, ట్యాక్సీలు అందుబాటులో ఉంటాయి. ఇక్కడి నుండి మిమికు సులభంగా వెళ్లవచ్చు. మిమిలో సుమారు 300 నుండి 400 అడుగుల ఎత్తులో నాలుగు పెద్ద గుహలు ఉన్నాయి. ఈ ప్రదేశం వన్యప్రాణులకు, గబ్బిలాలకు నివాసం. ఈ గబ్బిలాలు భయానకంగా ఉంటాయి కానీ మానవులకు ఎలాంటి హాని కలిగించవు. పర్యాటకులు ఈ ప్రదేశాలను సందర్శించడానికి ఇష్టపడతారు. గబ్బిలాల పండుగను చూడాలనుకునే వారు అక్టోబర్ నెలలో ఇక్కడికి వెళితే గ్రామస్తులు వాటిని వేటాడడం, విందు భోజనంగా వండుకుని తినడం ప్రత్యక్ష్యంగా చూడవచ్చు.గబ్బిలాలను చికెన్ వండే మాదిరిగానే వండుతారు. ఈ గ్రామాన్ని సందర్శించే బయటి గ్రామస్తులకు గబ్బిలాల మాంసాన్ని అన్నంతో పాటు విందుగా వడ్డిస్తారు. వంటకు ఉపయోగించగా మిగిలిన గబ్బిలాలను తరువాత వినియోగించేందుకు నిల్వ చేస్తారు. వీటి మాంసంలో ఔషధ గుణాలు ఉంటాయని గ్రామస్తుల విశ్వాసం. అనేక ప్రాంతాల నుండి ప్రజలు ఈ పండుగను చూసేందుకు ఇక్కడికి వస్తుంటారు.

సామూహిక పండుగ

                                                                                                 స్త్రీ, పురుషులు సమానంగా, సామూహికంగా గబ్బిలాల పండుగను జరుపుకుంటారు. భారత దేశంలోని ఈశాన్య ప్రాంతాలను పరిశీలిస్తే నాగాలాండ్ లోని ఓ చిన్న గ్రామంలో జరిగే ఈ గబ్బిలాల పండుగ ఎంతో ప్రాచుర్యం పొందింది. ప్రజలు చాలా దూర ప్రాంతాల నుండి కూడా ఈ పండుగను చూసేందుకు వస్తుంటారు. నాగాలాండ్ మరియు సమీప పర్యాటక ప్రదేశాలను సందర్శించేందుకు వచ్చే పర్యాటకులు అక్టోబర్ నెల వచ్చిందంటే మిమి గ్రామానికి వెళ్ళేందుకు ఆసక్తి చూపిస్తారు.నాగాలాండ్ రాజధాని కోహిమా ఒక ముఖ్యమైన హిల్ స్టేషన్. దీనిని మొదట్లో కెవిరా అని పిలిచేవారు. తరువాత బ్రిటిష్ వారు దీనిని కోహిమాగా పేరు మార్చారు.                                                                                                        ప్రకృతిని ఆస్వాదించడానికి భారత దేశంలోని ఉత్తమమైన ప్రదేశాలలో ఇది ఒకటి. ఈ ప్రదేశం కొండలు, లోయలతో గొప్ప ప్రకృతి దృశ్యాలను అందిస్తుంది. సాహసాలను ఇష్టపడే వారి కోసం ట్రెక్కింగ్, క్యాంపింగ్, హైకింగ్ వంటి ఆసక్తికరమైన కార్యకలాపాలు ఇక్కడ ఉన్నాయి. రెండవ ప్రపంచ యుద్ధంలో కోహిమా ప్రసిద్ధి చెందింది. యుద్ధంలో మరణించిన వేలాది మంది సైనికులను ఇక్కడ కామన్వెల్త్ యుద్ధ స్మశానవాటికలో ఖననం చేశారు. అంతే కాదు ఇక్కడ అనేక మ్యూజియంలు, జంతు ప్రదర్శనశాలలు, అభయారణ్యాలు, లోయలు, స్వయం ప్రతిపత్త గ్రామాలు ఉన్నాయి.

                                                                                                           నాగాలాండ్ రాష్ట్రంలో వేగంగా అభివృద్ది చెందుతున్న నగరం దిమాపూర్. నాగాలాండ్ సందర్శనకు వచ్చే టూరిస్టులు ఖచ్చితంగా ఈ నగరంలో పర్యటిస్తారు. ఎందుకంటే ఇక్కడే విమానాశ్రయం ఉంది. ట్రిపుల్ ఫాల్స్, కచారి, నాగాలాండ్ సైన్స్ సెంటర్, జూలాజికల్ పార్క్ వంటివి ఇక్కడ ప్రధాన ఆకర్షణలు. ధన్సిరీ నది నగరం యొక్క తూర్పు భాగం గుండా ప్రవహిస్తుంది. పశ్చిమ భాగంలో ఎక్కువగా అడవులు మరియు కొండలు ఉంటాయి. టూరిస్టులు ఇక్కడ ఒక రోజు గడిపి నగరాన్ని అన్వేషించి తదుపరి ప్రదేశాల పర్యటనలను వెళ్లవచ్చు.