ఎమ్మెల్యేకు కరోనా పాజిటివ్..ముందే సీఎంతో భేటీ

షాకింగ్ ఘటన... కాంగ్రెస్ పార్టీకి చెందిన ఎమ్మెల్యేకు కరోనా పాజిటివ్ అని తేలింది. గుజరాత్‌లోని అహ్మదాబాద్‌కు చెందిన ఈయన మంగళవారం సీఎంతోపాటు పలువురు మంత్రులతో భేటీ కావడం ఆందోళన కలిగిస్తోంది.

 

 

                                            గుజరాత్‌కు చెందిన ఓ ఎమ్మెల్యేకు కరోనా పాజిటివ్ అని తేలింది. కాంగ్రెస్ పార్టీకి చెందిన ఇమ్రాన్ ఖేడావాలాకు కోవిడ్ సోకినట్లు పరీక్షల్లో నిర్ధారణ అయ్యింది. ఆయన అహ్మదాబాద్‌లోని జమల్‌పూర్-ఖడియా నుంచి ప్రాతినిధ్యం వహిస్తున్నారు. కరోనా పాజిటివ్ అని తేలడానికి ఆరు గంటల ముందే ఆయన మరో ఇద్దరు ఎమ్మెల్యేలతో కలిసి.. సీఎం విజయ్ రూపానీ, డిప్యూటీ సీఎం నితిన్ పటేల్, కేంద్ర హోం శాఖ సహాయ మంత్రి ప్రదీప్ సింగ్ జడేజాను గాంధీనగర్‌లోని సెక్రటేరియల్‌లో కలిశారు. వీరు మధ్యాహ్నం ఒంటి గంటకు సమావేశమై.. అహ్మదాబాద్‌లో కరోనా వ్యాప్తి, తీసుకోవాల్సిన చర్యల గురించి చర్చించారు. రాత్రి 8 గంటల సమయంలో ఇమ్రాన్‌కు కరోనా పాజిటివ్ అని నిర్ధారణ అయ్యింది. ఈ వార్త తెలియగానే గుజరాత్ ప్రజలు ఒక్కసారిగా ఉలిక్కి పడ్డారు.

ఈ భేటీలో నేతలు సోషల్ డిస్టెన్సింగ్ పాటించారని ప్రభుత్వం చెబుతోంది. కానీ అహ్మదాబాద్ మిర్రర్ దగ్గరున్న ఫొటోలను బట్టి చూస్తే ఈ భేటీలో నేతలంతా మాస్కులు తీసేసి కనిపించారు. దరియాపూర్ ఎమ్మెల్యే గ్యాసుద్దీన్ కూడా ఇమ్రాన్ కారులో ప్రయాణించారని అహ్మదాబాద్ మిర్రర్ వెల్లడించింది. సీఎం ఆఫీసులోకి వెళ్లడానికి ముందు శరీర ఉష్ణోగ్రతతోపాటు బ్లడ్ రిపోర్ట్ చూస్తున్నారు. కానీ కరోనా సోకిన ఇమ్రాన్ సీఎం ఆఫీసులోకి వెళ్లడాన్ని బట్టి అక్కడ సెక్యూరిటీ సరిగా లేదనే అనుమానాలు వ్యక్తం అవుతున్నాయి.

ప్రస్తుతం కాంగ్రెస్ ఎమ్మెల్యే ఎస్వీపీ హాస్పిటల్‌లో చేరారు. ఆయన ప్రాతినిధ్యం వహిస్తోన్న జమల్‌పూర్ ప్రాంతంలో కరోనా కేసులు ఎక్కువగా నమోదు అవుతున్నాయి. లాక్‌డౌన్ కారణంగా ఆయన తన నియోజకవర్గ ప్రజలకు చేదోడుగా నిలుస్తూ సహాయక కార్యక్రమాల్లో పాల్గొంటున్నారు.