కారులో దెయ్యం ఉందా ... లేక ఆ హాలీవుడ్ హీరో ఆత్మ అయ్యాడా ... భలే మిస్టరీ
ఆ కారును కొన్న హాలీవుడ్ నటుడు ప్రమాదంలో దుర్మరణం చెందాడు. దాని విడిభాగాలు కొన్న వ్యక్తులు సైతం ప్రమాదాల్లో చనిపోయారు. చివరికి.. ఆ కారు ఊహించని విధంగా అదృశ్యమైంది. చివరిగా ఆ కారును తరలిస్తున్న ట్రక్కు డ్రైవర్‌ను చంపేసింది. ఈ కారు కథ వింటే వెన్నులో వణుకు పుడుతుంది.
విజయ దేవరకొండ నటించిన ‘ట్యాక్సీవాలా’, నయనతార నటించిన ‘డోరా’ సినిమాల్లో ఆత్మలు ఆవహించిన కార్లను చూసే ఉంటారు. బాలీవుడ్ సినిమా ‘టార్జన్’లో కూడా కారును ఆత్మ ఆవహించడాన్ని చూపించారు. మరికొన్ని పాత చిత్రాల్లో కూడా ఆత్మలు కార్లను ఆవహించడం, మనుషుల సాయంతో ఆ కార్లు విలన్లను చంపడం వంటివి చూసే ఉంటారు. కానీ, ఓ కారు ఏకంగా హీరో ప్రాణాలనే తీసింది. రోడ్డు ప్రమాదంలో ధ్వంసమైనా సరే.. అది తన ఉనికిని చాటుతూ పలువురి మరణానికి కారణమైంది. ఆ కారుతో సంబంధం ఉన్న వ్యక్తులు ఏదో ఒక రూపంలో మరణించారు. ప్రాణాలతో బయటపడినా.. ప్రశాంతంగా లేరు. ఇది వినేందుకు, చదివేందుకు విడ్డూరంగానే ఉండవచ్చు. కానీ, ప్రపంచంలో అంతుచిక్కని మిస్టరీల్లో ఒకటిగా ఉన్న ఈ కారు హిస్టరీని తెలుసుకుంటే ముచ్చెమటలు పడతాయి. అంతేకాదు.. ఈ కారు స్ఫూర్తితోనే పైన చెప్పుకున్న సినిమాలు తెరకెక్కాయంటే తప్పకుండా ఆశ్చర్యపోతారు. ఇంతకీ ఆ కారు కథ ఏమిటీ? ఆ హీరోకు.. ఆ కారుకు ఉన్న సంబంధం ఏమిటి? అతడి మరణం తర్వాత ఆ కారు విడి భాగాలను కొనుగోలు చేసిన వ్యక్తులకు ఏమైందీ? ఈ ఇవన్నీ తెలుసుకొనే ముందు.. ఆ హీరో గురించి తెలుసుకోవాల్సిందే.డీన్‌కు కార్లంటే చాలా పిచ్చి. ముఖ్యంగా రేసు కార్లతో దూసుకెళ్లడమంటే డీన్‌కు మహా సరదా. 1955 మారచి నెలలో డీన్ పామ్ స్ప్రింగ్స్ రోడ్ రేసెస్ పోటీల్లో పాల్గొన్నాడు. ఆ తర్వాత కూడా మరికొన్ని పోటీల్లో పాల్గొని అభిమానులతో రియల్ హీరో అనిపించుకున్నాడు. అతడి వేగం అంటే ప్రాణం.. అందుకే జీవితంలో కూడా వేగంగా ఎదగాలనుకున్నాడు. కానీ, ఆ వేగమే అతడి ప్రాణం తీస్తుందని, 24 ఏళ్లకే జీవితం ముగుస్తోందని ఊహించలేకపోయాడు.
ముగింపు పలికిన కొత్త కారు
అది సెప్టెంబరు 30, 1955న జేమ్స్ డీన్ తన మెకానిక్ రోల్ఫ్ ఉట్రైజ్‌తో కలిసి తన కొత్త కారును ట్రైల్ వేయడానికి లాంగ్ డ్రైవ్‌కు బయల్దేరారు. మధ్యాహ్నం సుమారు 3.30 గంటల సమయంలో పోలీసులు డీన్ కారును అడ్డగించారు. అతి వేగంగా వెళ్తున్నందుకు జరిమానా విధించారు. ఆ తర్వాత డీన్ తన ప్రయాణాన్ని కొనసాగించాడు. సాయంత్రం సుమారు 5.30 గంటల సమయంలో వెస్ట్‌బౌండ్ హైవే 466 మీదుగా వెళ్తుండగా.. ఫోర్డ్ ట్యూడర్ కారు ఢీకొట్టింది.
ఫోర్డ్ కారులో ఉన్న తుర్నూసీడ్ అనే డ్రైవర్ ఎడమ వైపు ఉన్న మలుపులోకి కారును తిప్పాడు. అదే సమయంలో డీన్ కారు వేగంగా అటుగా వచ్చింది. దీంతో తర్నూసీడ్ ఆ కారు.. డీన్ కారును ఢీకొట్టింది. రెప్పపాటు వ్యవధిలో డీన్ కారు గాల్లోకి లేచింది. అందులో ఉన్న రోల్ఫ్ కారు నుంచి బయట పడిపోయాడు. కానీ, డీన్ మాత్రం కారుతోనే గాల్లో గింగిర్లు కొట్టి పడిపోయాడు. తలకు బలమైన గాయం, శరీరం నుజ్జు కావడంతో డీన్ దుర్మరణం చెందాడు. రోల్ఫ్ తలకు బలమైన గాయమైంది. పక్కటెముకలు విరిగాయి. కానీ, తుర్నూసీడ్ స్వల్ప గాయాలతో తప్పించుకున్నాడు.
డీన్ జీవించి ఉంటే.. హలీవుడ్‌లో ప్రముఖ హీరోగా రాణించేవాడని అక్కడి సినీ పెద్దలు పేర్కొన్నారు. అతడు మరణం తర్వాత ప్రకటించిన అకాడమీ అవార్డుల్లో ‘ఈస్ట్ ఆఫ్ ఈడెన్’ సినిమాకు బెస్ట్ లీడింగ్ యాక్టర్ పురస్కారం లభించింది. కానీ, దాన్ని అందుకోడానికి డీన్ జీవించి లేడు. అయితే, డీన్ మరణం తర్వాత కూడా జీవించే ఉన్నాడని అతడి అభిమానులు నమ్మారు. దీనికి కారణం.. ఆ కారే. ఔను, ఆ కారు వల్ల డీన్ మాత్రమే కాదు.. దాని విడి భాగాలను వాడిన వ్యక్తులు కూడా ప్రమాదాల్లో చిక్కుకున్నారు.
యాక్సిడెంట్ జరిగిన స్థలం నుంచి కారును తొలగించి ట్రక్కులోకి ఎక్కించారు. అయితే, ట్రక్కులో ఉన్న కారు.. ఒక్కసారిగా వెనక్కి వెళ్లి అందులో ఉన్న ఓ మెకానిక్ కాళ్ల మీదకు ఎక్కింది. ట్రక్కు ఏటవాలుగా ఉండటం వల్ల అలా జరిగి ఉండవచ్చని భావించారు. ఈ కారును విడిభాగాలు విక్రయించే బ్యారీస్ అనే వ్యక్తి కొనుగోలు చేశాడు. బ్యారిస్ వద్ద ఇంజిన్ కొనుగోలు చేసిన ట్రాయ్ మెక్‌హెన్రీ తన స్నేహితుడు విలియం ఎస్రీచ్ కారుతో పోటీ పడుతూ ప్రమాదానికి గురయ్యాడు. మెక్ హెన్నీ కారుపై పట్టుకోల్పోయి చెట్టును ఢీకొని చనిపోయాడు. ఆ కారుతో పోటీపడిన విలియం కారు సైతం అదుపుతప్పింది. కానీ, విలియం ప్రాణాలతో బయటపడ్డాడు.
ప్రమాదం తర్వాత డీన్ కారు టైర్లు చెక్కు చెదరలేదు. వాటిని బ్యారీస్ మరో వ్యక్తికి విక్రయించాడు. ఆ వ్యక్తి కూడా రోడ్డు ప్రమాదానికి గురయ్యాడు. అయితే, ప్రాణాలతో తప్పించుకున్నాడు. ఈ వరుస ఘటనల తర్వాత బ్యారీస్ కారులోని మిగతా భాగాలను తన వద్దే ఉంచుకున్నాడు. ఎవరికీ అమ్మకూడదని భావించాడు. ఓ రోజు అతడి గ్యారేజ్‌లోకి చొరబడిన ఇద్దరు దొంగలు ఆ కారు స్టీరింగ్ వీల్, సీట్లను దొంగిలించబోయి గాయపడ్డారు. ఈ ఘటన తర్వాత బ్యారీస్ ఆ కారును కొద్ది రోజులు గ్యారీజీలో జాగ్రత్తగా దాచి పెట్టాలని, హైవే సేఫ్టీ ఎగ్జిబిషన్‌కు తరలించాలని నిర్ణయించుకున్నాడు.
కారును ఎగ్జిబిషన్‌కు తరలించాలని భావించిన కొద్ది రోజుల్లోనే ఆ గ్యారీజీలో అగ్నిప్రమాదం చోటుచేసుకుంది. చిత్రం ఏమిటంటే.. ఆ ప్రమాదంలో కారుకు ఎలాంటి నష్టం వాటిల్లలేదు. దీంతో బ్యారీస్‌కు దిమ్మ తిరిగింది. ఇక ఆలస్యం చేయకుండా ఆ కారును వదిలించుకోవాలని బ్యారీస్ భావించాడు.
విద్యార్థికి గాయాలు
ప్రమాదం తర్వాత ఆ కారును స్థానిక హైస్కూల్‌లో రోడ్డు ప్రమాదాలపై అవగాహన కలిగించే ఎగ్జిబిషన్‌కు తరలించారు. విద్యార్థులంతా ప్రమాదానికి గురైన కార్లను చూస్తుండగా ఊహించని ఘటన చోటుచేసుకుంది. ‘లిటిల్ బాస్టర్డ్’ కారు ఓ విద్యార్థి మీద పడింది. దీంతో ఆ విద్యార్థికి పక్కటెముకలు విరిగాయి.
ఈ కారు ఎవరికి కనిపించినా లేదా ఎవరైనా వినియోగిస్తున్నట్లు సమాచారం అందినా తమకు తెలపాలని ఇల్లినాసిస్‌లోని వోలో ఆటో మ్యూజియం ప్రకటించింది. కారు ఆచూకీ చెప్పినవారికి ఒక మిలియన్ డాలర్లు (రూ.7,48,76,000) చెల్లిస్తామని తెలిపింది. కానీ, ఆ కారు ఇప్పటికీ ఆ కారు గురించి సమాచారం లేదు. ప్రమాదం తర్వాత ఆ కారును ఎవరైనా ఎత్తుకెళ్లారా? మాయమైందా అనేది ఇప్పటికీ తెలియరాలేదు. మరోవైపు.. ఈ కారు ప్రమాదంతో సంబంధం ఉన్న డీన్ మెకానిక్ రోల్ఫ్ పరిస్థితి దయనీయంగా మారింది.
ప్రమాదం జరిగిన రోజు డీన్‌తోపాటు ప్రయాణించిన రోల్ఫ్ మానసిక రోగిగా మారిపోయాడు. 1960లో ఒకసారి, 1967 మరోసారి ఆత్మహత్యాయత్నం చేశాడు. తాను చనిపోయే ప్రయత్నంలో భార్యను 14 సార్లు కత్తితో పోడిచాడు. లక్కీగా ఆమె ప్రాణాలకు ఏమీ కాలేదు. అయితే, రోల్ఫ్ 1981లో మద్యం తాగి వాహనాన్ని నడుపుతూ రోడ్డు ప్రమాదంలో చనిపోయాడు. అదే ఏడాది.. డీన్ కారును ఢీకొట్టిన తుర్నూసీడ్ లంగ్ క్యాన్సర్‌తో చనిపోవడం గమనార్హం
కామెంట్‌లు
కామెంట్‌ను పోస్ట్ చేయండి